ძიებაზე გადასვლა მთავარ მენიუზე გადასვლა სიახლეებზე გადასვლა განცხადებებზე გადასვლა მოსახლეობისათვის, ბენეფიციარებისთვისა და სამედიცინო სფეროს წარმომადგენლების კონტენტზე გადასვლა მთავარ გვერდზე გადასვლა
  • კონტრასტი:

  • განლაგება:

  • შრიფტი:

  • A
GEEN
moh.gov.ge
ჯანმრთელობის ეროვნულმა სააგენტომ კარდიოვერტერ-დეფიბრილატორების უსასყიდლოდ გაცემა დაიწყო
13 იანვარი, 2021

ჯანმრთელობის ეროვნულმა სააგენტომ კარდიოვერტერ-დეფიბრილატორების უსასყიდლოდ გაცემა დაიწყო

 

საყოველთაო ჯანდაცვის სახელმწიფო პროგრამის    უპრეცედენტო  კარდიოქირურგიული პროექტი აღსრულების ფაზაში შევიდა - ჯანმრთელობის ეროვნულმა სააგენტომ  შესაბამისი საჭიროების მქონე პაციენტებისთვის სასიცოცხლო მნიშვნელობის, დასავლური სტანდარტის გულის აპარატების, კარდიოვერტერ-დეფიბრილატორების უსასყიდლოდ გაცემა დაიწყო.  

 

აპარატის გადაცემის პროცედურა მარტივია და პაციენტის უშუალო ჩართულობას არ საჭიროებს: ექიმი, შესაბამისი ოპერაციის შესახებ გადაწყვეტილების მიღების შემდეგ, ჯანმრთელობის ეროვნულ სააგენტოში კონკრეტულ პაციენტზე ელექტრონულ განაცხადს აკეთებს, რომელსაც სააგენტო აკმაყოფილებს და სამედიცინო დაწესებულებისთვის დეფიბრილატორის  დანიშნულების ადგილზე უფასო მიწოდებას უზრუნველყოფს.

 

რთული არითმიების დროს, უეცარი სიკვდილისგან თავდაცვის ეფექტური საშუალება, იმპლანტირებადი  კარდიოვერტერ-დეფიბრილატორი - ესაა „ჩაშენებული რეანიმატოლოგი“, რომელიც ექსტრემალურ სიტუაციაში   სიცოცხლის გადარჩენის პროცედურას ავტომატურ რეჟიმში ახორციელებს. თუ ხელსაწყო  გულის რითმულობის უმნიშვნელო დარღვევას აღმოაჩენს, ის იწყებს უმტკივნეულო ელექტრული იმპულსების  გენერირებას. საჭიროებისამებრ,   „ჭკვიანი აპარატი“ უფრო მძლავრ  რეჟიმზეც გადადის  და  გულის ჯანსაღ რითმს აღადგენს.

 

აპარატის სატენდერო  მახასიათებლები  „არითმოლოგთა ასოციაციასთან“ ერთად განისაზღვრა. შედეგად,  დღეს სააგენტო უზრუნველყოფილია აშშ-ის ერთ-ერთი ავტორიტეტული კომპანიის მიერ წარმოებული, მსოფლიოს წამყვან კლინიკებში აპრობირებული  დეფიბრილატორებით, რომლებიც სპეციალისტების დადებითი შეფასებით სარგებლობენ.

აპარატების  რაოდენობა  ბოლო წლების სტატისტიკაზე დაყრდნობით განისაზღვრა.   ერთი წლის მარაგი უკვე სააგენტოს საცავებშია  და ის, საჭიროებისამებრ, სისტემატურად შეივსება. 

 

კარდიოვერტერ-დეფიბრილატორების ბენეფიცირებისთვის უფასოდ გადაცემის პროექტი მთავრობის 520-ე დადგენილებას  უკავშირდება, რომელიც ჯანდაცვის სექტორის გრძელვადიან განვითარებასა და გაძლიერებაზეა ორიენტირებული.

 

გატარებულმა ცვლილებებმა, საყოველთაო ჯანდაცვის პროგრამაში ჩართულ სხვადასხვა კლინიკაში ამ და სხვა მომსახურებაზე ტარიფების გათანაბრებამ, ბენეფიციართა თანაგადახდის წილი  საგრძნობლად შეამცირა, რაც  მოსახლეობისთვის მნიშვნელოვანი შეღავათია. შედეგად, პაციენტის ჯიბიდან გადასახადი კარდიოქირურგიულ მომსახურებაზე, ჯამში,  2,5 მლნ ლარზე მეტით შემცირდა.

 

მოქალაქეებს კლინიკებისთვის, საყოველთაო ჯანდაცვის პაკეტის შესაბამისად,  მხოლოდ სამედიცინო მომსახურების ღირებულების თანაგადახდა მოუწევთ, რომლის ოდენობა, სოციალური სტატუსის მიხედვით, 0-დან 20 პროცენტამდე განისაზღვრება.

 

აღნიშნული შეღავათით მთავრობის N165-ე და N218-ე დადგენილებებით  გათვალისიწინებული პირები სარგებლობენ.

 

ჯანდაცვის ხელმისაწვდომობაზე ორიენტირებული  მოცემული პროექტის მიზანია საყოველთაო ჯანმრთელობის დაცვის პროგრამის შესაბამისი საჭიროების მქონე ბენეფიციარებისთვის მაღალი ხარისხის მომსახურების ფინანსური  მხარდაჭერა.

 

დევნილთა, ეკომიგრანტთა და საარსებო წყაროებით უზრუნველყოფის სააგენტოდამოკიდებულების პრევენციის სერვისიდევნილებისთვის - იცოდე შენი ქულასოციალური მომსახურების სააგენტოსსიპ სამედიცინო და ფარმაცევტული საქმიანობის რეგულირების სააგენტოსოლიდარობის ფონდიადამიანით ვაჭრობის მსხვერპლთა, დაზარალებულთა დაცვისა და დახმარების სახელმწიფო ფონდიდაავადებათა კონტროლისა და საზოგადოებრივი ჯანმრთელობის ეროვნული ცენტრიფსიქიკური ჯანმრთელობისა და ნარკომანიის პრევენციის ცენტრიშრომის ბაზრის საინფორმაციო სისტემააჭარის ავტონომიური რესპუბლიკააფხაზეთის ავტონომიური რესპუბლიკის ჯანმრთელობის და სოციალური დაცვის სამინისტრო